टीकापुर, साउन ४
शिक्षकको मृत्युको घटनामा प्रहरीले तीनजनालाई पक्राउ गरेको छ । प्रहरीले घटनाको अनुसन्धान भैरहेकाले पक्राउ परेका व्यक्तिको पहिचान गोप्य राखेको छ ।
इलाका प्रहरी कार्यालय टीकापुरका प्रहरी नायब उपरिक्षक नविन राजा बुढाथोकीले एक शिक्षकको शंकास्पद मृत्यु भएको जानकारी दिएका छन । उनले मृत्यु हुनेमा जानकी गाउँपालिका वडा नम्बर ४ कञ्चनपुरस्थित जनता नमूना माविका शिक्षक ४५ वर्षका जगदीस पन्त रहेको बताए ।
शिक्षक पन्त धनगढी उपमहानगरपालिका तारानगरका बासिन्दा हुन । उनी विगत १७ वर्षदेखी विद्यालयमा अंग्रेजी विषय अध्यापन गर्दै आएको प्रधानाध्यापक नारायण तिमिल्सिनाले जानकारी दिए ।
घटना विवरण अनुसार विदामा घर गएका शिक्षक पन्त साउन ३ गते नै धनगढीबाट फर्केका थिए । प्रधानाध्यापक तिमिल्सिनाका अनुसार उनीसँगै अर्का एकजना शिक्षक समेत फर्केका थिए । उनीहरु दुवैजना दुर्गौलीमा अलग अलग घरमा डेरामा बस्ने गरेको प्रधानाध्यापक तिमिल्सिनाले बताए ।
धनगढीबाट दुर्गौली पुगेका पन्त र अर्का शिक्षक आ–आफ्नो डेरामा गए । प्रधानाध्यापक तिमिल्सिनाका अनुसार दुवैजना शिक्षक आ–आफ्नो डेरामा गएको केही समय पछि मृतक पन्तले ती अर्का शिक्षकलाई कल गरेर टीकापुर बोलाए ।
ती अर्का शिक्षक र एक अर्को व्यक्ति टीकापुरस्थित एक होटलमा पुग्दा मृतक पन्त छट्पटाईरहेको अवस्थामा भेटिएको बताईएको छ । उनीहरु दुईजनाले मृतक पन्तलाई उपचारका लागि टीकापुर अस्पताल पुर्याएका थिए । अस्पतालका चिकित्सकले शिक्षक पन्तलाई मृत घोषणा गरेका थिए ।
प्रहरीले घटनालाई शंकास्पद भनेको छ । प्रहरी नायब उपरिक्षक बुढाथोकीले घटनाको अनुसन्धान भैरहेको जानकारी दिए । उनले विष सेवनको आशंका गरेका छन ।
मृतक पन्तले आफै विष सेवन गरे वा अरु कसैले विष सेवन गराएको हो भन्ने बारेमा प्रहरीले अनुसन्धान गरिरहेको छ । प्रहरीले मृतक पन्त सो होटलमा एक्लै थिए वा अरु कोही व्यक्तिहरु पनि सँगै थिए भन्ने बारेमा केही खुलाएको छैन ।
‘घटनाको अनुन्धान भैरहेको छ’ प्रहरी नायब उपरिक्षक बुढाथोकीले भने–‘केही कुरा शंकास्पद छ ।’ प्रहरीका अनुसार घटना साँझ साढे सात बजेतिर भएको हो ।
मृतक शिक्षक पन्तका आफन्त राति नै टीकापुर पुगेका छन । शवको पोष्टमार्टम टीकापुरमै गर्ने कि धनगढी गर्ने भन्ने बारेमा छलफल भैरहेको प्रधानाध्यापक तिमिल्सिनाले जानकारी दिए । ‘आफन्तले धनगढीमै पोष्टमार्टम गर्ने भन्ने सुनेको छुँ’ उनले भने–‘प्रहरीले अनुमति दिन्छ कि दिँदैन सो बारे छलफल भैरहेको छ ।’
मृतक शिक्षक पन्तको घटना शंकास्पद भन्दै विद्यार्थी विरोधमा उत्रिएका छन । उनीहरुले शिक्षकको हत्या गरेको आरोप लगाएका छन । केही विद्यार्थीहरुले सामाजिक सञ्जाल मार्फत शिक्षकको हत्या विरुद्ध प्रदर्शनमा उत्रिन आह्वान गरेका छन ।
तस्विर ः सामाजिक सञ्जाल
