टीकापुर, साउन ४
टीकापुर अस्पतालमा शनिवार उपचारका लागि आएकी एक वृद्धा आइतवार मृत अवस्थामा भेटिएकी छन ।
इलाका प्रहरी कार्यालय टीकापुरका प्रहरी नायब उपरिक्षक नविन राजा बुढाथोकीले टीकापुर नगरपालिका वडा नम्बर १ जमराटोलकी ८८ वर्षीया हिरादेवी धामी मृत अवस्थामा भेटिएको जानकारी दिए ।
उनले वृद्धा टीकापुर अस्पतालको दक्षिण पूर्वी कुनामा मृत अवस्थामा भेटिएको बताए । प्रहरी र आफन्तले खोजतलास गर्ने क्रममा वृद्धा आइतवार १० बजेतिर मृत अवस्थामा भेटिएकी हुन ।
प्रहरी नायब उपरिक्षक बुढाथोकीले मृत अवस्थामा भेटिएकी वृद्धाको शरीरमा बाह्य चोटपटक नदेखिएको जानकारी दिए । उनले वृद्धाको शव पोष्टमार्टमका लागि टीकापुर अस्पतालमै राखिएको बताए ।
वृद्धा शनिवार १२ बजेतिर बुहारीसँगै उपचारका लागि भन्दै घर नजिकैको टीकापुर अस्पताल पुगेकी थिईन । उनको घर र अस्पतालको दूरी आधा किलोमिटर भन्दा पनि कम छ ।
