टीकापुर, साउन १२
टीकापुर जेसीजले कर्णाली माध्यमिक विद्यालय टीकापुरका विद्यार्थीलाई आज स्कुल ब्याग वितरण गरेको छ । जेसीजले सप्ताह कार्यक्रमको दोस्रो दिन टीकापुर नगरपालिका–१ कर्णाली माध्यमिक विद्यालयमा अध्यनरत गरिब तथा जेहन्दार ४० जना विद्यार्थीलाई हिमालयन लाईफ इन्स्योरेन्सको सहयोगमा स्कुल ब्याग वितरण गरेको हो ।
टीकापुर जेसीजका कार्यकारिणी उपाध्यक्ष एवम् कार्यक्रमका संयोजक पदम बहादुर शाहीको अध्यक्षतामा भएको स्कुल ब्याग वितरण कार्यक्रमको प्रमुख अतिथि टीकापुर जेसीजका मानार्थ सदस्य पृथ्वीराज ढुङ्गाना रहेका थिए । प्रमुख अतिथि ढुङ्गानाले स्कुल ब्याग वितरण समारोहको अवसरमा बोल्दै कार्यक्रमले विद्यार्थीको शैक्षिक उन्नतिमा महत्वपूर्ण योगदान पुर्याउने बताए ।
सो अवसरमा विशिष्ट अतिथि टीकापुर नगरपालिका १ नम्बर वडा कार्यलयका वडा अध्यक्ष एवम् कर्णाली मा.वि.का व्यवस्थापन समिति अध्यक्ष मोहन वि.क.ले टीकापुर जेसीजले विगत लामो समय देखि टीकापुर क्षेत्रमा जेसीज युवाहरु मार्फत व्यक्तित्व र नेतृत्व विकासमा राम्रो क्रियाकलाप गर्दै आइरहेको बताए । उनले गरिब तथा जेहन्दार विद्यार्थीलाई स्कुल ब्यागले शैक्षिक क्षेत्रमा थप उर्जा मिल्ने बताउदै विद्यार्थीलाई जुनियर जेसीजमा आवद्ध हुन समेत आग्रह गरे ।
कार्यक्रमका अतिथि हिमालयन लाइफ इन्स्योरेन्स सुदूरपश्चिम प्रदेशका उपप्रमुख तारा सिंह बमले सामाजिक उत्तरदायित्व अन्तरगत टीकापुर जेसीज संग सम्वनय गर्दै आवश्यकता भएका विद्यार्थीलाई स्कुल ब्याग वितरण गर्न पाउँदा खुसी लागेको बताए ।
उनले जीवन बिमा गर्नु पनि सामाजिक कार्य रहेको र त्यसमा पनि यसरी गरिब तथा जेहन्दार विद्यार्थीलाई स्कुल ब्याग वितरण गर्दा विद्यार्थीको शैक्षिक भविष्य उज्ज्वल हुने बताए ।
कार्यक्रममा जेसीज आस्था लिखराम चौधरी, मिसन भिजन वाचन अभिषेक शाह, स्वागत मन्तव्य सुनिल चौधरी, धन्यवाद मन्तव्य टीकापुर जेसीजका अध्यक्ष भरत भण्डारीले राखेका थिए भने सञ्चालन महासचिव भानुभक्त जैशीले गरेका थिए ।
