टीकापुर, साउन १३
प्रधानमन्त्री केपी शर्मा ओलीले राष्ट्रिय स्वतन्त्र पार्टीका सभापति रवी लामिछानेप्रति लक्षित टिप्पणी गर्दै उनी थुनामा जानुमा सरकारको कुनै हात नरहेको टिप्पणी गरेका छन् ।
राष्ट्रिय गौरबको रानी, जमरा, कुलरिया सिँचाइ आयोजनाको उद्घाटन कार्यक्रममा बोल्दै प्रधानमन्त्री ओलीले लामिछानेमाथि सरकारले प्रतिशोध लियो भन्ने कुरा भ्रामक रहेको बताए ।
‘कतिपय मान्छेहरुलाई सरकारले प्रतिशोध लियो भन्ने परेको छ, अपराध गरेर ठगी गरेपछि अदालतले थुन्छ, त्यो प्रतिशोध होइन्’ लामिछानेको नाम नलिएरै ओलीले भने ‘मैले नै गृहमन्त्री बनाएको हो, राजनीतिमा ल्याएको हो, विभिन्न किसिमका अपराध गर्यो अनि सरकारलाई गाली गर्यो, सरकार अदालत होइन, अदालतले थुन्छ कि छोड्छ सरकारको हातमा हुँदैन, ठगी गरेपछि अदालतले थुन्छ त, गर्ने बेलामा नचाहिने काम गर्ने, गर्ने बेलामा आँखा नदेख्ने, अनि पछि लौ प्रतिशोध, के को प्रतिशोध ?’
नेकपा एमालेका अध्यक्ष समेत रहेका ओली त्यतिमै रोकिएनन् । उनले आफ्नो ठट्यौली पारामै भने ‘दुई–चार जनालाई सही गरायो, घरमा गएर दनादन दनादन हस्ताक्षर क्याम्पेन, अहिले त कति हो लाख भन्छन्, हस्ताक्षर गराउने साथीहरुलाई म भन्न चाहन्छु, हस्ताक्षर तीन करोड भन्दा माथि नलिनु होला ।’
ओलीले संसदमा व्यवस्था विरोधीहरु समेत रहेकाले उनीहरुले संसद अवरुद्ध गर्नु कुनै ठूलो कुरा नभएको समेत बताए । ‘लोकतन्त्रमा आएका व्यवस्था विरोधी केही तरमाराहरु समेत छन्, उनीहरुले विरोध गरिरहन्छन्’ ओलीले भने ‘तर हामीले देशको विकासमा जुट्नुको विकल्प छैन, त्यसैका लागि दुई ठूला दलको सरकार गठन भएको हो, यो सरकार आगामी चुनावसम्मै जान्छ ।’
