टीकापुर, साउन १६
टीकापुर नगरपालिकाको कार्यालयमा तालाबन्दी गरेका आन्दोलनरत सुकुम्बासी तथा अव्यवस्थित बसोबासीहरुलाई नगर प्रमुख रामलाल डगौरा थारुले अन्तरवार्ताका क्रममा आफूबाट गल्ती भएको स्वीकार्दै ताला खोलिदिन आग्रह गरेका छन् । 

नगर प्रमुख थारुले एक विज्ञप्ति जारी गर्दै अनलाइनमा आफ्‌नो धारणा राख्दा केही शब्द त्रुटि हुन गई सुकुम्बासी र अव्यवस्थित बसोबासीमा पर्न गएको भ्रमप्रति दुःख व्यक्त गरेका छन् । 

उनले विज्ञप्तिमा ‘मैले अनलाइन खबरमा धारणा राख्ने क्रममा केही शब्दहरु त्रुटी हुन गई कहिँ कतै सुकुम्बासी नागरिकहरुमा पर्न गएको भ्रम र त्रासप्रति दुःख व्यक्त गर्दछु’ भनेका छन् । 

विज्ञप्तिमा नगर प्रमुखको हैसियतले प्रचलित कानुन अनुसार विकास निर्माण कार्य तथा अन्य सेवा सुविधाहरु उपलब्ध गराउन पहल गर्ने, सहयोग र सहजीकरण गर्ने विश्वास दिलाउने उल्लेख गरेका छन् ।   

नगर प्रमुख थारुले भूमि आयोगले समस्या समाधानका लागि कार्य गरिरहेकाले घोषित आन्दोलनका कार्यक्रमहरु स्थगित गरी ताला खोलिदिन आग्रह गरेका छन् । विभिन्न शिविरमा बसोबास गर्दै आएका सुकुम्बासी तथा अव्यवस्थित बसोबासीहरुले नगर प्रमुख थारु विरुद्ध नाराबाजी गर्दै आन्दोलनमा उत्रिएका छन् । 

टीकापुर बहुमुखी क्याम्पसको जग्गा अतिक्रमण गरी बसेका सुकुम्बासी तथा अव्यवस्थित बसोबासीहरुलाई जग्गा दिन नसकिने भन्दै उकालो अनलाइनमा नगर प्रमुख थारुको अन्तरवार्ता प्रकाशित भएको थियो । नगर प्रमुख थारुको उक्त अभिव्यक्तिपछि उनीहरु चरणबद्ध संघर्षका कार्यक्रम गर्दै आइरहेका छन् । तालाबन्दीका कारण पालिका केन्द्रबाट सम्पादन हुने कामहरु प्रभावित भएको पालिकाले जनाएको छ ।