टीकापुर, साउन २३
सुदूरपश्चिमको प्रसिद्ध धार्मिक तीर्थस्थल बडीमालिका दर्शन गरेर फर्किने क्रममा भीरबाट लडेर एक तीर्थयात्रीको मृत्यु भएको छ । बडीमालिका दर्शन गरेर नाटेश्वरी फर्किने क्रममा भीरबाट लडेर ५२ वर्षिय विप्लव ओझाको मृत्यु भएको हो ।

काठमाडौंको गोकर्णेश्वर नगरपालिका वडा नं. ५ घर भएका ओझा बिहिबार साँझ भीरबाट लडेको जिल्लाका प्रहरी कार्यालय बाजुराका प्रहरी नायब उपरिक्षक इकवाल हवारीले बताए । उनका अनुसार नाटेश्वरी आउने क्रममा विस्नेपानी नजिकै भीरबाट लडेका ओझा खोल्सामा मृत अवस्थामा भेटिएका हुन् । 

राति अबेर घटना घटेकाले खोल्सामा अड्किएको शव झिक्न नसकिएको उनले बताए । लगातार वर्षा भइरहेकाले शवलाई खोलाबाट माथि ल्याउन समस्या भएको छ । उद्धारका लागि नेपाली सेनाको हेलिकप्टर ल्याउने तयारी गरिए पनि खराब मौसमका कारण सम्भव नभएको प्रहरीले जनाएको छ ।

आज बडिमालिका शक्तिपीठमा विशेष पूजा भइरहेको छ भने बुढिनन्दामा पनि पूजा आरम्भ भएको छ ।