टीकापुर, साउन २३
कैदीबन्दी बिचको लफडाबाट अछुतो नरहने कैलाली कारागारमा फेरि झडप भएको छ । बिहीबार कारागारमा कैदीबन्दीबिच झडप हुँदा पाँच जना घाइते भएका छन् ।

जिल्ला प्रशासन कार्यालयका सूचना अधिकारी शिवराज जोशीले झडपका क्रममा घाइते भएका पाँच जनाको सेती प्रादेशिक अस्पतालमा उपचार भइरहेको बताए ।  

कैलालीका प्रमुख जिल्ला अधिकारी गोगनबहादुर हमालले भूपेन्द्र बडुवाल हत्या प्रकरणमा जोडिएका तीन जनाको अन्यत्र सरूवा भएको कारण झडप भएको बताए । तीन जनाको स्थानान्तरण गर्ने क्रममा विवाद हुँदा झडप भएको उनको भनाइ छ । 

कारागारको ए र बी ब्लकमा रहेका कैदीबन्दीबिच कुटाकुट भएको बताइएको छ । कैदीबन्दीबिच कुटाकुट भएपछि कैलाली प्रहरी प्रमुख बालनरसिंह राणा, डीएसपी राजकुमार सिंहले कारागार पुगेर घटनाबारे जानकारी लिएका छन् । 

कैलालीमा पछिल्लो समय सामुहिक झडपको असरले कारागारमा लफडा हुँदै आएको छ । जिल्लामा सामुहिक झडप गर्नेहरु कारागार चलान भएपछि कारागारभित्र लफडा हुँदै आएको बताइएको छ । केही समयअघि कारागारका कैदीबन्दी सरुवाको विषयमा झडप हुँदा नाइके खगेन्द्र बोगटीमाथि कुटपिट भएको थियो ।