टीकापुर, साउन २३
सुदूरपश्चिम विश्वविद्यालयको कृषि विज्ञान संकाय टीकापुरमा अध्ययन गरी ‘लर्न एण्ड अर्न’ कार्यक्रममा इजरायल पुगेर हमासको अपहरणमा परेका कञ्चनपुरका विपीन जोशीको खोजीका लागि उनकी आमा र बहिनी इजरायल जाने भएका छन् ।
प्यालेस्टाइनी लडाकु समूह हमासको अपहरणमा परेका जोशीकी आमा र बहिनीलाई इजरायलले आफ्नो मुलुक लैजाने तयारी गरेको हो । इजरायलको किबुजबाट सन् २०२३ अक्टोबर ७ मा हमासले अपहरण गरेका विपिनको रिहाइका लागि अन्तर्राष्ट्रियस्तरमा दबाब बढाउन आमा पद्मा र बहिनी पुष्पालाई लैजाने तयारी गरेको हो ।
आमा पद्मा र बहिनी पुष्पालाई नेपालस्थित इजरायली दूतावासले आगामी सोमबार इजरायल लैजाने तयारी गरेको विपिनका दाइ किशोर जोशीले जानकारी दिए ।
‘एम्बेसीले सोमबारको टिकट काटेको छ । आन्टी (काकी) र बहिनीलाई इजरायल लैजाने भनिएको छ,’ उनले खबरहबसँग टेलिफोनमा भने, ‘१०–१५ दिन अगाडि बोलाउनुभएको थियो । सबै डकुमेन्ट (कागजपत्र) तयार भइसकेको छ ।’
इजरायलले विपिनकी आमा र बहिनीलाई संयुक्त राष्ट्रसंघसम्म पुर्याउने तयारीसमेत गरेको छ । ‘विपिनको रिहाइका लागि राष्ट्रसंघमार्फत पहल र दबाबका लागि आग्रह गर्ने र अमेरिकी राष्ट्रपतिसँग पनि भेट गराउने योजना छ,’ विदेश मन्त्रालयका मध्य–पूर्वी एसिया विभागका प्रमुख सागी कार्नीलाई उद्धृत गर्दै विभिन्न सञ्चारमाध्यमले समाचार प्रकाशित गरेका छन् ।
‘लर्न एन्ड अर्न’ कार्यक्रमअन्तर्गत कृषिसम्बन्धी अध्ययनका लागि इजरायल पुगेका विपिन दक्षिणी इजरायलको किबुजबाट अपहरणमा परेका थिए ।
हमासको आक्रमणमा परी विपिनसँगै रहेका १० जना नेपाली विद्यार्थीको मृत्यु भएको थियो । उक्त आक्रमण कूल १२ शय मानिसहरू मारिएका थिए । हमासले विपिनसहित २५१ जनालाई बन्धक बनाएको थियो ।
