धनगढी, साउन २५
एक जना कैदीको मृत्यु हुने गरी कैलाली कारागारभित्र भएको कैदी बन्दीबिचको झडपपछि कैलाली कारागार अझै सुरक्षाकर्मीको नियन्त्रणमा आउन सकेको छैन । यद्यपि अवस्था भने सामान्य भइसकेको कैलालीका प्रमुख जिल्ला अधिकारी (सिडिओ) गोगनबहादुर हमालले दाबी गरे । 

‘स्थिति हिजो जस्तो छैन । अवस्था सामान्य भइसकेको छ’ सिडिओ हमालले भने, ‘अहिले कैदीबन्दीहरूले आफन्त र परिवारजनसँग भेटघाट गरिरहनु भएको छ ।’ तर कारागारको भित्री परिसरमा सुरक्षाकर्मी भने पसिनसकेको उनले बताए । ‘कारागारभित्र पहिले मानवअधिकारवादीलगायत सरोकारवालाको टोली गएपछि मात्रै सुरक्षाकर्मी पठाउने हाम्रो तयारी छ’ उनले भने । 

शुक्रबार रातिको घटनापछि कैदीबन्दीहरूले कारागारको भित्री भाग पूर्ण रूपमा कब्जा गरेका थिए । मूल गेटमा घरेलु हात हतियार र ढुंगामुडासहित कैदीबन्दी बसेपछि सुरक्षाकर्मीहरू भित्र पस्न सकेका थिएनन् । 

यस्तै कैदीबन्दीहरूले ग्याँस सिलिण्डर पड्काएर जेलमै आगो लगाइदिने धम्की दिइरहेका थिए । सिडिओ हमालले नै कैदीबन्दीहरूले गेटमा प्रेसर कुकर बम लिएर बसेको प्रतिक्रिया दिएका थिए । 

आइतबार उनले अवस्था सामान्य भने पनि कैदी बन्दीहरूको आक्रोश अझै नघटेको स्रोत बताउँछ । आफन्त र मानव अधिकारवादी संघ संस्थाका प्रतिनिधिसँग कुरा गर्न चाहे पनि उनीहरूले सुरक्षा निकायलाई ‘इन्टरटेन’ गरेका छैनन्। 

जेलर र सुरक्षा टोली परिवर्तन 

उता कैलाली कारागारमा भएको रक्तपातपूर्ण घटनापछि कारागार विभागले कारागार प्रमुख(जेलर) वसन्त खत्रीलाई जिम्मेवारीबाट हटाएको छ । उनको ठाउँमा जलान्धर भुसाललाई पठाइएको छ । भुसाल शनिबारै धनगढी पुगिसकेको सिडिओ हमालले जानकारी दिए । 

यस्तै घटनाका बेला कारागारको सुरक्षामा खटिएको टोलीलाई पनि परिवर्तन गरेको सिडिओ हमालले जानकारी दिए । ‘हिजो नै पूरै टोली बदलिसकिएको छ । त्यसका अतिरिक्त पनि ठूलै सुरक्षा टोली परिचालन गरिएको छ’ हमालले भने ।

नागरिक न्यूज