टीकापुर, साउन २५
नेपाल रेडक्रस सोसाइटी टीकापुर उपशाखाको नयाँ नेतृत्व चयनका लागि निर्वाचन कार्यक्रम सार्वजनिक गरिएको छ । उपशाखामा १ हजार ५६ आजीवन सदस्य रहेका छन् । सार्वजनिक गरिएको निर्वाचन कार्यक्रम अनुसार साउन २८ गते मतदान हुने उल्लेख छ । 

निर्वाचन अधिकारी रंगप्रसाद तिमिल्सेनाका अनुसार साउन २६ गते आव्हन गरिएको साधारण सभामा ५१ प्रतिशत गणपूरक सदस्य संख्या पुगे मात्रै साउन २८ गते मतदान हुनेछ ।

‘आजीवन सदस्यहरु मध्ये ५१ प्रतिशत गणपूरक संख्या पुगेका खण्डमा साधारण सभा भएको दुई दिनभित्र मतदान गर्नुपर्ने प्रावधान छ’ टीकापुर उपशाखाका पूर्व अध्यक्ष जगदिश्वर पण्डितले भने ‘गणपूरक संख्या नपुगेका खण्डमा मतदानका लागि अर्को मिति तय गरिनेछ ।’

साधारणसभाले उपशाखामा सभापति, महिला उपसभापति, सचिव, कोषाध्यक्ष, उपसचिव, उपकोषाध्यक्ष, महिला सदस्य र ४ जना खुल्ला सदस्य चयन गर्नेछ ।