टीकापुर, साउन २७
कैलालीको टीकापुर नगरपालिका वडा नं. १ का युवा वैज्ञानिक अरुण लोहारलाई युवा प्रतिभा सम्मान २०८२ प्रदान गरिएको छ । विश्व प्रसिद्ध मानिने अमेरिकास्थित राष्ट्रिय हवाई यातायात तथा अन्तरिक्ष प्रशासन (नासा) को एक परियोजनामा नेभिगेटरका रुपमा छनौट भएका युवा वैज्ञानिक अरुणलाई अन्तर्राष्ट्रिय युवा दिवसको अवसरमा प्रदेश युवा परिषद धनगढीले उक्त सम्मान प्रदान गरेको हो ।
नासा स्पेस एप च्यालेञ्ज २०२५ मा अन्तरिक्षका बारेमा विश्वभरबाट अनुसन्धान गरिरहेका वैज्ञानिक, विद्यार्थी, इन्नोभेटर्स, प्रोग्रामर्सहरुलाई अनलाइनका माध्यमबाट मेन्टर र गाइड गर्ने नेभिगेटरका रुपमा छनौट भएका अरुणलाई सुदूरपश्चिम प्रदेशका मुख्यमन्त्री कलमबहादुर शाहले सम्मान गरेका हुन् ।
श्रोत साधनको अभावमा व्यक्तिगत खर्चबाट खगोल विज्ञान सम्बन्धी ७० हजार भन्दा बढी विद्यार्थीलाई सचेतना कार्यक्रम सञ्चालन गर्दै आएका अरुणलाई सम्मान गर्दै मुख्यमन्त्री शाहले तत्काल एक लाख आर्थिक सहयोग गर्ने र प्रदेश सरकारले वृद्धि विकासमा समेत मद्दत गर्ने बताएका हुन् ।
लोहारले देशका विभिन्न स्थानहरुमा निःशुल्क खगोल विज्ञान सम्बन्धि क्रियाकलाप गर्दै आइरहेका छन । कार्यक्रमलाई सम्बोधन गर्दै सुदूरपश्चिम प्रदेशका मुख्यमन्त्री शाहले युवा शक्तिहरूलाई नवप्रवर्तनसँग जोड्नुपर्नेमा जोड दिएका छन् । अन्तर्राष्ट्रिय युवा परिषद् २०२५ को उपलक्ष्यमा प्रदेश युवा परिषद्ले बर्दगोरियामा आयोजना गरेको कार्यक्रमलाई सम्बोधन गर्दै उनले सो कुरा बताएका हुन् ।
युवा वर्गलाई प्रदेशमै रोजगारी दिनका निमित्त प्रदेश सरकारले युवा जनशक्तिलाई नवप्रवर्तन, स्टार्टअपका साथै सीप रोजगारी कार्यक्रम ल्याएको मुख्यमन्त्री शाहले बताए ।
कार्यक्रमलाई सम्बोधन गर्दै विशिष्ट अतिथि एवं बर्दगोरिया गाउँपालिकाका अध्यक्ष कर्ण बहादुर कुँवरले युवा वैज्ञानिक अरुणलाई पालिकाले ल्यापटप प्रदान गर्ने घोषणा गरेका हुन् ।
सामान्य आर्थिक अवस्थाका अरुणले खगोलीय अध्ययनका लागि उच्च क्षमताको ल्यापटपको अभाव झेलिरहेका थिए । पालिका अध्यक्ष कुँवरले युवालाई नवप्रवर्तनमा सहयोग पुर्याउने उद्देश्यले पालिकाले ल्यापटप प्रदान गर्ने घोषणा गरेका हुन् ।
