टीकापुर, साउन २७
‘दिगो विकास र सुनौलो भविष्यको सारः स्थानीय युवाको सहभागिता समृद्धिका आधार’ भन्ने मुल नाराका साथ आज विश्वभर २५औं अन्तर्राष्ट्रिय युवा दिवस विभिन्न कार्यक्रम गरी मनाइएको छ । 

युवा दिवसको अवसरमा घोडाघोडी नगरपालिका वडा नं. १० पहलवानपुरमा रहेको सहारा युवा क्लबले रक्तदान कार्यक्रमको आयोजना गरेको थियो ।रक्तदान कार्यक्रममा सुदुरपश्चिम प्रदेशका सर्वाधिक सतक रक्तदाता रक्तदान सदभावना दूत दीपक उपाध्यायले ११०औं पटक रक्तदान गरेका  छन् । रक्तदान कार्यक्रममा उपाध्याय सहित ५१ जनाले रक्तदान गरेको क्लबका अध्यक्ष निर्मल कुमार मिश्रले जानकारी दिए । 

त्यसैगरी, अन्तर्राष्ट्रिय युवा दिवसकै अवसर पारेर नेपाली युवा उद्यमी मञ्च धनगढी च्याप्टरले समेत रक्तदान कार्यक्रमको आयोजना गरेको थियो । रक्तदान कार्यक्रममा १५ जनाले रक्तदान गरेको मञ्चका अध्यक्ष अच्युत दाहालले बताए । 

सर्वाधिक रक्तदाता उपाध्याय सम्मानित 

११०औं पटक रक्तदान गरी रक्तदानको क्षेत्रमा उल्लेखनीय योगदान गरेको भन्दै क्लबले पहलवानपुरले उपाध्यायलाई सम्मान गरेको छ । उपाध्यायलाई घोडाघोडी नगरपालिकाका मेयर खडकबहादुर रावत र क्लबका अध्यक्ष निर्मल मिश्रले प्रशंसापत्र सहित सम्मान गरेका छन् । 

यसैगरी युवा उधमी मञ्च धनगढीले समेत उपाध्यायलाई सम्मान गरेको छ । मञ्चका अध्यक्ष दाहाल र संस्थापक अध्यक्ष पुष्कर ओझाले रक्तदानको क्षेत्रमा अहोरात्र खटी स्वयम् सयौं पटक रक्तदान गरी रगतको अभावमा रहेका हजारौंको जीवन बचाउन खेलेको भूमिकाको प्रशंसा गर्दै उपाध्यायलाई दोहल्ला प्रशंसापत्र र नगद सहित सम्मान गरेको मञ्चका प्रथम उपाध्यक्ष आशिष शाहले बताए ।