टीकापुर, साउन २८
नेपाल रेडक्रस सोसाइटी टीकापुर उपशाखाको २९औं साधारण सभा गणपुरक संख्या अपुग भएपछि स्थगित भएको छ । टीकापुर जेसिजको हलमा आयोजित साधारण सभामा उपशाखाका १ हजार ५६ आजीवन सदस्य मध्ये ५१ प्रतिशत उपस्थिति नपुग्दा साधारण सभा स्थगित भएको हो ।
नयाँ नेतृत्व चयनका लागि भइरहेको साधारण सभामा गणपुरक संख्या नपुगेपछि भदौ १३ गतेका लागि पुनः आव्हन गरिएको छ । उपशाखाका सचिव धर्मराज शर्माले दिएको जानकारी अनुसार गणपुरक संख्या नपुग्दा कार्यसमितिको बैठकले भदौ १३ गतेका लागि साधारण पुनः आव्हन गर्ने निर्णय गरेको हो ।
भदौ १३ गते साधारण सभामा गणपुरक संख्या पुगे सम्भवतः भदौ १४ गते नै निर्वाचनका कार्यक्रम हुने शर्माले बताए ।
साधारण सभाबाट आगामी दुई वर्षका लागि उपशाखा सभापति, महिला उपसभापति, सचिव, कोषाध्यक्ष, उपसचिव, उपकोषाध्यक्ष, महिला सदस्य र ४ जना खुल्ला सदस्य चयन हुनेछन् ।
उपशाखाको २९औं साधारणसभालाई प्रमुख अतिथिको आशनबाट सम्बोधन गर्दै नेपाल रेडक्रस सोसाइटीका पूर्व केन्द्रिय सदस्य उत्तमराज जोशीले टीकापुर उपशाखामा सञ्चालित रक्त सञ्चार केन्द्रबाट निःशुल्क रक्त सेवा उपलब्ध गराउने देशभरिका उपशाखामा पहिलो टीकापुर उपशाखा रहेको बताए ।
‘रेडक्रसका देशभर १६२२ उपशाखाहरु रहेका छन्, ती मध्ये टीकापुर उपशाखा देशभरि नै उत्कृष्ठ कार्य गर्दै आएको उपशाखा हो’ कैलाली रेडक्रसका पूर्व सभापति समेत रहेका जोशीले भने ‘देशभरका उपशाखामध्ये निःशुल्क रक्त सेवा उपलब्ध गराउने समेत टीकापुर नै पहिलो उपशाखा हो ।’
कार्यक्रममा बोल्दै उनले केन्द्रिय कार्यसमितिमा बस्ने कतिपय सदस्यहरुका कारण नेपाल रेडक्रस विगत पाँच वर्षदेखि विवादित हुन पुगेकामा दुःख व्यक्त गरे । ‘आपसी खिचातानीका कारण केन्द्रिय समितिमा केही वर्षदेखि विवाद उत्पन्न भएको छ’ जोशीले भने ‘सरकारले हालै गठन गरेको तदर्थ समितिले यो विवादको समाधान निकाल्ने विश्वास लिएको छु ।’
उपशाखाका सभापति दत्तबहादुर विष्टको अध्यक्षतामा भएको उद्घाटन कार्यक्रममा जिल्ला रेडक्रस कैलालीका उपसभापति दीपा बडायक, बलिया उपशाखाका सभापति विनोद आचार्य, टीकापुर उपशाखाका पूर्व अध्यक्षद्वय नृपबहादुर खड्का र जगदिश्वर पण्डित, निर्वाचन अधिकारी रंगप्रसाद तिमिल्सेना, पत्रकार परमानन्द पाण्डे लगायतले बोलेका थिए ।
उपसभापति मीना कुँवरले स्वागत गरेको कार्यक्रमको सञ्चालन उपशाखा सचिव धर्मराज शर्माले गरेका थिए ।
