टीकापुर, साउन २८

साउन ३० गते हुने टीकापुर साना शहरी खानेपानी उपभोक्ता तथा सरसफाइ संस्थाको निर्वाचनमा होमिएका उम्मेदवारले संस्थामा आर्थिक पारदर्शितालाई मुख्य एजेण्डा बनाएका छन् ।

टीकापुर जेसीजको आयोजनामा आज भएको ककस कार्यक्रममा संस्थाको नेतृत्वका लागि उम्मेदवारी दिएका उम्मेदवारहरुले संस्थामा आर्थिक पारदर्शितालाई मुख्य एजेण्डका रुपमा प्रस्तुत गरेका हुन् ।

अध्यक्ष, उपाध्यक्ष, सचिव र कोषाध्यक्ष पदका उम्मेदवारहरु सहभागी भएको कार्यक्रममा उम्मेदवारले आफ्ना प्रतिबद्धता व्यक्त गरे ।

वर्तमान कार्यसमितिका कार्यबाहक अध्यक्ष रहेर अध्यक्ष पदमा उम्मेदवार दिएकी सिर्जना शर्मा पण्डितले संस्थाको आर्थिक सबलीकरणमा काम गर्न खोजेको बताउँदै संस्थालाई पारदर्शी बनाउन हरेक महिनाको आयव्यय सार्वजनिक गर्ने प्रतिबद्धता गरिन् ।

दुई कार्यकाल कोषाध्यक्ष रहेका अध्यक्षका प्रत्यासी विश्राम थारुले शुद्ध खाने उपभोक्ताको घर घरमा पुर्याएर संस्थालाई उपभोक्ताको संस्था बनाउने छु । उनले सडकमा परेका अस्तव्यस्त पाइप लाइनलाई व्यवस्थित गर्दै उपभोक्ता थप गर्दै संस्थामा आयआर्जन वृद्धि गरिने बताए ।

कार्यसमिति सदस्य रहेर अध्यक्षकी प्रत्यासी सरिता रावल थापाले  जमिनको सतहबाट निकालेर वितरण गर्नु दिगो नसक्ने स्थितिमा कर्णालीको पानी उपभोक्ताको घरघरमा पुर्याउन प्रयास गर्ने बताइन् । खानेपानीको बिल तिर्न कार्यालय पुग्नुपर्ने बाध्यतालाई हटाउँदै आफ्नो घरबाटै बिल तिर्ने सिस्टम लागु गर्ने गरिने बताइन् ।

कार्यक्रममा सचिव पदका उम्मेदवार मनिष बलायर, प्रकाश खड्का, खगेन्द्र रिमाल र मन्जित सिह रावलले संस्थागत पारदर्शिता, आर्थिक अनियमितताको छानबिन, बेथितिलाई निरुत्साहित गर्ने बताए  । 

कार्यक्रममा कोषाध्यक्षका उम्मेदवार बलबहादुर विश्वकर्मा, सुमनकुमार न्यौपाने, गोपालबहादुर थापाले आफ्ना प्रतिबद्धता प्रस्तुत गरे ।

टीकापुर जेसिजका अध्यक्ष भरत भण्डारीको अध्यक्षतामा भएको कार्यक्रमका प्रमुख अतिथि टीकापुर नगरपालिकका नगर प्रमुख रामलाल डगौरा थारु रहेका थिए ।