टीकापुर, भदौ ३
वर्ल्डभिजन इन्टरनेशनल नेपालका साझेदार चार संस्थाको जिल्ला परियोजना सल्लाहकार समितिको बैठक टीकापुरमा सम्पन्न भएको छ ।
वर्ल्डभिजनको सहयोगमा सञ्चालित बाल कल्याण संघ, दीगो विकास समाज, विकासका लागि युवा एक्येवद्धता (यार्ड) र सामाजिक विकासका लागि सचेत समाज (सिएसएसडी) को जिल्ला परियोजना सल्लाहकार समितिको बैठक सम्पन्न भएको हो ।
परियोजनाहरुले कैलालीका टीकापुर, भजनी र घोडाघोडी नगरपालिका तथा जानकी, र कैलारी गाउँपालिकाका विभिन्न वडामा सञ्चालित कार्यक्रमहरुबारे बैठकमा समिक्षा भएको छ ।
कैलालीका जिल्ला समन्वय अधिकारी भोजराज भट्टले परियोजनाबाट सञ्चालित कार्यक्रमहरुले गरिबीको दुष्चक्रलाई तोड्ने रणनीति बनाउनु आवश्यक रहेको बताए । भट्टले परियोजनाले जैविक तरकारी उत्पादनका लागि कृषकहरुलाई सहयोग पुर्याउँदै आएकोमा कृषि उत्पादनको मूल्य वृद्धि चेन स्थापित गर्न सके थप प्रभावकारी हुने बताए ।
‘परियोजना अन्तर्गत सञ्चालित रुपान्तरण कक्षाले बालबालिकामा चेतनाको स्तर वृद्धि भएको पाएका छौं’ भट्टले भने ‘कृषि हाटबजार, तरकारी उत्पादन जस्ता कार्यक्रमलाई उद्यमशीलता विकासमा जोड्नु आवश्यक रहेको छ ।’ उनले परियोजनाले आगामी दिनमा आर्थिक विकासका साथै व्यावसायिक स्थायित्व हुने खालका कार्यक्रमहरु लागुपर्नेमा जोड दिए ।
कार्यक्रममा बोल्दै जिल्ला समन्वय समितिका संयोजक टीकाकुमारी चौधरी भुलले महिलालाई आर्थिक गतिविधिमा सक्रिय गराउनुपर्नेमा जोड दिइन् । उनले रुपान्तरण कक्षाले बालबालिकामा अधिकार र कर्तव्यबारे बोध गराएको बताउँदै आगामी दिनमा समेत कार्यक्रमको निरन्तरता हुनुपर्ने बताइन् ।
कार्यक्रममा जिल्ला समन्वय समितिका उपसंयोजक खगराज भुसाल, भजनी नगरपालिकाका नगर प्रमुख केबल चौधरी, टीकापुर नगरपालिका वडा नं. ७ का अध्यक्ष यज्ञप्रसाद न्यौपाने, टीकापुर नगरपालिकाका आर्थिक प्रशासन शाखा प्रमुख लक्ष्मी ओड, जिल्ला समन्वय समितिका सूचना अधिकारी बिमलप्रकाश जोशी लगायतले परियोजनाबाट सञ्चालित कार्यक्रममाथि सुझावहरु दिएका थिए ।
वर्ल्ड भिजनले परियोजना सञ्चालित पालिकामा गरिरहेका कामबारे जानकारी दिँदै जिल्ला वर्ल्ड भिजनका कैलाली जिल्ला संयोजक मंगल शाहले परियोजनाको कार्यक्रम चक्र, आगामी रणनीति, सबल पक्ष र चुनौतिका विषयमा प्रस्तुती दिएका थिए ।
बैठकमा सिएसएसडीका सुरज चौधरी, यार्डका भेषराज चौधरी, दीगो विकास समाजका प्रभु ढकाल र बाल कल्याण संघका राधिका गिरीले परियोजनाबाट सञ्चालित कार्यक्रमहरुका बारेमा प्रस्तुती दिएका थिए । कार्यक्रममा दीगो विकास समाजका अध्यक्ष रामबहादुर सुनारले स्वागत गरेका थिए ।
परियोजनाहरुले शिक्षा, बालविकास, विपद्, कृषि, पोषण, महिला र आर्थिक विकासका क्षेत्रमा विभिन्न कार्यक्रमहरु सञ्चालन गर्दै आइरहेका छन् ।
