टीकापुर, भदौ ८
स्थानीय तह संस्थागत क्षमता स्वमूल्याङ्कन (लिजा) को नतिजामा कैलालीको घोडाघोडी नगरपालिका प्रदेशमै उत्कृष्ठ पालिका भएको छ । संघीय मामिला तथा सामान्य प्रशासन मन्त्रालयले सार्वजनिक गरेको आर्थिक वर्ष २०८०/०८१ को लिजा नतिजामा सर्वाधिक अंक ल्याउँदै घोडाघोडी उत्कृष्ठ हुँदा टीकापुर भने ११औं स्थानमा छ । 

घोडाघोडी नगरपालिका गतवर्ष समेत सर्वाधिक अंकसहित प्रदेशमै उत्कृष्ट भएको थियो । घोडाघोडीले ८५ दशमलव ५० अंक ल्याएर उत्कृष्ठ हुँदा बाजुराको बुढीगंगा नगरपालिका ८४ दशमलब २५ अंकसहित दोश्रो भएको छ । 

कैलालीका १३ वटा स्थानीय तहमध्ये धनगढी उपमहानगरपालिकाले ८४ दशमलव अङ्क प्राप्त गरी दोस्रो भएको छ भने गोदावरी नगरपालिका र चुरे गाउँपालिकाले समान ८१ अङ्क प्राप्त गरी तेस्रो भएका छन् । 

बर्दगोरिया गाउँपालिकाले ७९ दशमलव २५, जानकी गाउँपालिकाले ७७ दशमलव ७५, गौरीगंगा नगरपालिकाले ७५ दशमलव ७५, भजनी नगरपालिका र कैलारी गाउँपालिकाले समान अङ्क ७१ दशमलव ७५ अंक प्राप्त गरेका छन् । 

जोशीपुर गाउँपालिका र टीकापुर नगरपालिकाले समान अङ्क ७० दशमलव ७५, लम्की चुहा नगरपालिकाले ६५ अङ्क र मोहन्याल गाउँपालिकाले ५५ दशमलव ५० अङ्क पाएका छन् । मन्त्रालयले गाउँपालिका तथा नगरपालिकाको गुणस्तर परीक्षणको कार्य मन्त्रालयबाट सम्पन्न भई अन्तिम नजिता सार्वजनिक गरिएको हो ।

स्वमूल्याङ्कन कार्यले स्थानीय तहको कार्य प्रक्रिया र उपलब्धीको लेखाजोखा गरी शासकीय प्रक्रिया र विकास व्यवस्थापनमा गर्नुपर्ने सुधारका क्षेत्रहरू पहिचान गर्ने, आवधिक समीक्षाको आधारमा प्राप्त गर्ने र स्थानीय सरकारबिच स्वस्थ प्रतिस्पर्धाको भावना जागृत गराउने उद्देश्य स्वमूल्याङ्कनको रहेको जनाइएको छ ।