धनगढी, भदौ १० 
सशस्त्र प्रहरीले कैलालीको धनगढीबाट साढे १० लाख बढीको औषधिसहित दुई जनालाई पक्राउ गरेका छ । धनगढी उपमहानगरपालिका वडा नं. ७ मोतिचोकबाट १० लाख ६५ हजार १ शय ८५ रुपैयाँको औषधिसहित दुई जनालाई पक्राउ गरिएको हो ।

सशस्त्र प्रहरी बल नेपाल नम्बर ३४ गण हेडक्वाटर कैलालीबाट खटिएको नौ जनाको टोलीले भारतबाट अबैध रुपमा भन्सार छली नेपाल भित्र्याइरहेको अवस्थामा कैलारी गाउँपालिका वडा नं. ५ पवेराका ३० वर्षीय मनोजकुमार चौधरी र गौरीगंगा नगरपालिका वडा नं. १० उदासीपुरका २६ वर्षीय खेमराज चौधरीलाई पक्राउ गरेको हो । 

औषधी र औषधी बोक्न प्रयोग गरिएको मोटरसाइकल पनि नियन्त्रणमा लिएको नम्बर ३४ गणले जनाएको छ । पक्राउ परेका व्यक्ति तथा बरामद गरिएको औषधी र मोटरसाइकल कैलाली भन्सार कार्यालय धनगढीमा बुझाएको जनाइएको छ ।