टीकापुर, भदौ १०

टीकापुर अस्पतालमा रहेको प्रयोगशाला फेरी एक पटक विवादमा आएको छ । प्रयोगशालाको रिपोर्ट गलत भएको भन्दै एक स्थानीयले इलाका प्रशासन कार्यालय टीकापुरमा छानविनका लागि निवेदन दिएका छन ।

प्राप्त जानकारी अनुसार टीकापुर नगरपालिका वडा नम्बर १ का दिपेश जैशीले यस्तो निवेदन दिएका हुन । उनले आफ्नो नवजात शिशुको स्वास्थ्य रिपोर्टमा लापरवाही भएको निवेदनमा उल्लेख गरेका छन ।

उनले मिति २०८२ भदौ ९ गते निवेदन पेश गरेपछि कार्यालयले सोही मितिमा टीकापुर अस्पताललाई पत्राचार गरेको छ । शाखा अधिकृत सर्वनन्द चपाँईले जैशीको निवेदन अनुसार के कसो भएको हो ? र के कति कारणले गर्दा उक्त रिपोर्ट फरक पर्न गएको हो ? सो सम्बन्धमा यथार्थ विवरण खुलाई पठाई दिन भनेका छन । जैशीले टीकापुर अस्पताललाई समेत कारवाहीको माग गर्दै निवेदन दिएका छन ।

उनको निवेदनमा उल्लेख भए अनुसार २०८२ साउन ३१ गते जन्मिएकी छोरीको २०८२ भदौ ५ गते अस्तापलको प्रयोगशालामा हेमोग्लोबिन जाँच गरिएको थियो । अस्पतालको प्रयोगशालाले दिएको रिपोर्टमा नवजात शिशुको शरीरमा हेमोग्लोबिनको मात्रा ७ दशमलव २ मात्रै उल्लेख छ ।

नवजात शिशुको शरीरमा हेमोग्लोबिनको मात्रा निकै कम भएपछि जैशीले उपचारका लागि नेपालगञ्ज लगेका थिए । जहाँ सञ्जीवनी कलेज अफ मेडिकल साइन्सले नवजात शिशुको शरीरमा हेमोग्लोबिनको मात्रा १९ दशमलव ५ देखाएको छ ।

जैशीका अनुसार त्यहाँका विशेषज्ञ चिकित्सकले नवजात शिशुलाई हेमोग्लोबिनको कुनै समस्या नरहेको बताएका छन । विशेषज्ञ चिकित्सकले अस्पतालको रिपोर्टमा त्रुटी रहेको बताएको जैशीले जानकारी दिए । केही समयअघि अस्पतालको प्रयोगशालामा म्याद सकिएको केमिकल प्रयोग हुने गरेको कुरा सार्वजनिक भएको थियो । सो केमिकल प्रयोग भएको बारे प्रयोगशालाकै स्वास्थ्यकर्मीले स्विकारेका थिए ।