टीकापुर, भदौ १२

प्रहरी प्रधान कार्यालयले कैलाली प्रहरी प्रमुख एवं एसपी बालनरसिंह राणालाई केन्द्रमा तानेको छ ।

जिल्ला प्रहरी कार्यालय कैलालीको नयाँ प्रमुखमा केन्द्रीय अनुसन्धान ब्युरो (सीआईबी)मा कार्यरत एसपी नरेन्द्र चन्दलाई पठाइएको छ ।

बुधबार (भदौ ११) काज सरुवा गरेर एसपी राणालाई प्रहरी प्रधान कार्यालयमा तनिएको हो । चन्दलाई कैलाली प्रहरी प्रमुखको जिम्मेवारी दिइएको हो ।

गएको साउन २३ गते राति कैलाली जिल्ला कारागारमा कैदीबन्दीबीच झडप भएको थियो । त्यसक्रममा एक कैदीको मृत्यु भएको थियो ।

उक्त घटनामा सुरक्षा समन्वयमा कमजोरी देखिएको भन्दै प्रमुख जिल्ला अधिकारी (सीडीओ) गोगनबहादुर हमाललाई साउन २८ गते नै केन्द्रमा तानिएको थियो  ।

दाङका सीडीओ कृष्णप्रसाद लम्साललाई कैलाली खटाइएको थियो । त्यसको दुई सातापछि एसपी राणा समेत तानिएका हुन् ।