टीकापुर, भदौ १३
कैलालीका विभिन्न ठाउँबाट लागुऔषधसहित एकैदिन पाँच जना पक्राउ परेका छन् । जिल्ला प्रहरी कार्यालय कैलालीले दिएको जानकारी अनुसार टीकापुर नगरपालिका वडा नं. ५ का २५ वर्षीय रबि चौधरी लागुऔषधसहित पक्राउ परेका हुन् ।
इलाका प्रहरी कार्यालय टीकापुरबाट खटिएको प्रहरी टोलीले चौधरीको घर कोठा खाँनतलासी गर्दा १ शय ८० मिलिग्राम खैरो हेरोइन र २ ग्राम ८ शय ६० मिलिग्राम चरेशसहित उनलाई नियन्त्रणमा लिएको हो ।
उता, धनगढी उपमहानगरपालिका वडा नं. २ चौराहाबाट कञ्चनपुरको कृष्णपुर नगरपालिका वडा नं. ७ का २० वर्षीय नसिव रानासहित तीन जना ४ ग्राम ४ शय ६० मिलिग्राम लागुऔषध खैरो हेरोइनसहित पक्राउ परेका हुन् । उनीहरुले प्रयोग गरेको से ४ प १७४५ नम्बरको मोटरसाइकलसहित तिनै जनालाई जिल्ला प्रहरी कार्यालय कैलालीबाट खटिएको प्रहरी टोलीले नियन्त्रणमा लिएको छ ।
त्यस्तै वडा नं. १३ लक्ष्मीनगरबाट कैलालीगाउँ बस्ने ३२ वर्षीय रामजिवन राना पनि लागुऔषधसहित पक्राउ परेका छन् ।
रानालाई चेकजाँच गर्दा उनको साथबाट १ शय ६० मिलिग्राम खैरो हेरोइन फेला पारी उनलाई प्रहरी चौकी कैलालीगाउँबाट खटिएको प्रहरी टोलीले नियन्त्रणमा लिएको हो ।
पक्राउ परेका पाँचै जना माथि म्याद थप गरी अनुसन्धान भइरहेको प्रहरीले जनाएको छ ।
