अछाम, भदौ १३
अछाममा त्रिपाल टाँगी सुतिरहेको अवस्थामा पहिरोमा परि दुई जनाको मृत्यु भएको छ । अछामको पंचदेवल विनायक नगरपालिका वडा नं.८ बारलामा सुतेको समयमा ढुंगाले लागेर दुई जनाको मृत्यु भएको हो ।  

आज विहान करिब ५ बजेको समयमा सेलापानीस्थित चुरखोली टोलमा पहिरोसँगै खसेको ढुंगा लागेर ३५ वर्षिया निम खनाल र मंगलसेन नगरपालिका वडा नं. ६ की ७ वर्षिया कविता भण्डारीको घटनास्थलमै मृत्यु भएको प्रहरीले जनाएको छ । 

उनीहरूसँगै सुतेकी कविताकी आमा रत्ना भण्डारी घाइते भएकी छिन् । उनलाई उपचारको लागि स्थानीय स्वास्थ्य चौकी बारला पठाइएको प्रहरीले जनाएको छ ।

निम र रत्ना दुबै महिला महिनावारी भएको समयमा घरदेखि टाढा खेतबारीमा त्रिपाल टाँगेर सुतेको अवस्थामा घटना भएको वडा अध्यक्ष छत्रबहादुर शाहीले बताए । कविता आमासँगै सुत्न गएकी थिइन् ।

गाउँमाथिको भीरबाट ढुंगा त्रिपालमाथि खसेको शाहीले बताए । भण्डारी परिवारको स्थायी ठेगाना मंगलसेन नगरपालिका वडा नं. ६ रहेको छ ।उनीहरू केही महिना पहिले मात्रै ससुराली गाउँमा गएर बसेको बुझिएको वडा अध्यक्ष शाहीले बताए ।

अछाममा छाउगोठहरू भत्काइए पनि महिनावारी भएको समयमा कोही पाल टाँगेर, कोही डोकोमा, कोही शौचालयमा समेत सुत्ने गरेको शाहीले जानकारी दिए ।