टीकापुर, भदौ १४
टीकापुर क्षेत्रका व्यवसायीको साझा संस्था टीकापुर उद्योग वाणिज्य संघको नेतृत्व चयनका लागि चुनावी सरगर्मी बढेको छ । संघका प्रथम उपाध्यक्ष सन्तोष खड्का र द्वितीय उपाध्यक्ष कृष्णप्रसाद बजगाईं प्यानलसहित चुनावी मैदानमा उत्रिएपछि चुनावी सरगर्मी बढेको हो । आगामी तीन वर्षका लागि संघको २६औं वार्षिक साधारण सभाले नयाँ नेतृत्व चयन गर्नेछ ।
अध्यक्ष पदका प्रत्यासी खड्काले उद्योगी व्यवसायीहरुको हकहित स्थापित गर्न, व्यावसायिक वातावरण निर्माणमा पहल गर्न, टीकापुरमा औद्योगिक क्षेत्र स्थापना गर्न, केरालाई टीकापुरको ब्राण्ड बनाउने लगायतका मुख्य एजेण्डासहित चुनावी मैदानमा होमिएको बताए ।
‘हामी व्यावसायिकका सुख दुःखमा साथमै रहनेछौं, टीकापुरमा व्यावसायिक वातावरण बनाउन, औद्योगिक क्षेत्र स्थापना गर्न, संघको अधूरो भवन पूरा गर्न मेरो उम्मेदवारी हो’ प्रत्यासी खड्काले भने ‘उपभोक्ता, स्थानीय सरकार, सबै राजनीतिक दल, संघसंस्था र आमनागरिकसँग हातेमालो गर्दै यहाँको व्यापार व्यवसाय प्रबद्र्धन, व्यावसायिक स्थायित्वका लागि काम गर्नेछौं ।’
अध्यक्षका अर्का प्रत्यासी कृष्णप्रसाद बजगाईं व्यावसायिक वातावरण निर्माण गर्नु नै आफ्नो मुख्य एजेण्डा रहेको बताए । ‘टीकापुर पर्याप्त सम्भावना भएको क्षेत्र हो, यहाँ व्यावसायिक वातावरण निर्माण गर्न आवश्यक छ’ बजगाईंले भने ‘व्यावसायिकताको विकास, रोजगारी सिर्जना नै हाम्रा मुख्य एजेण्डा हुन् ।’
खड्का नेतृत्वको प्यानलबाट संघका वर्तमान सचिव तपेन्द्र कुँवर उद्योग उपाध्यक्ष र कोषाध्यक्ष लोकेश साउँद वाणिज्य उपाध्यक्ष पदमा चुनावी मैदानमा छन् । संघको महासचिवका लागि कार्यसमिति सदस्य पृथ्वीराज ढुंगाना, सचिवमा हिक्मत रावल र कोषाध्यक्षमा टेकबहादुर सोडारी चुनावी मैदानमा उत्रिएका छन् ।
बजगाई नेतृत्वको प्यानलबाट दीपेन्द्रबहादुर रावल उद्योग उपाध्यक्ष र अर्जुन भट्टराई वाणिज्य उपाध्यक्ष पदमा चुनावी मैदानमा होमिएका छन् । त्यस्तै महासचिवका लागि कार्यसमिति सदस्य प्रकाश उपाध्याय तिमिल्सेना, सचिवमा प्रकाश शाह र कोषाध्यक्षमा टीका शाही टिया चुनावी मैदानमा उत्रिएका छन् ।
खड्का नेतृत्वको प्यानलबाट आठ जना खुल्ला सदस्यहरुका लागि रुपकबहादुर विष्ट, मोती खत्री, डम्बर कडायत, उपेन्द्र बटाला, हेमन्त रिमाल, सैलेश साउँद (ह्यारी), जनकबहादुर विष्ट र विजय धामी चुनावी मैदानमा उत्रिएका छन् ।
बजगाईं नेतृत्वको प्यानलबाट खुल्ला सदस्यहरुका लागि सर्पराज साउँद, प्रकाशबहादुर विश्वकर्मा, जनकबहादुर रावत, आशिष जैशी, जनक रावल, दीपक साउँद, हरि कुश्मी प्रतिस्पर्धामा छन् ।
आरक्षणतर्फ खड्का नेतृत्वको प्यानलबाट महिला सदस्यमा जानकी शाह, दलित सदस्यमा रामबहादुर टमट्टा र जनजाति सदस्यमा सन्तोष कठरिया चुनाबी मैदानमा छन् ।
आरक्षण सदस्यमा बजगाईं नेतृत्वको प्यानलबाट महिला सदस्य ईशारा कुमारी साउँद दलित सदस्य रमेश तिखातरी र जनजाति सदस्यमा दानबहादुर चौधरी चुनाबी मैदानमा उत्रिएका छन् ।
