टीकापुर, भदौ १४
टीकापुर उद्योग वाणिज्य संघको २६औं साधारण सभामा अध्यक्ष पदका उम्मेदवार सन्तोष खड्का नेतृत्वको प्यानलले आज उम्मेदवारी घोषणा गरेको छ । खड्का नेतृत्वको प्यानलले पत्रकार सम्मेलनको आयोजना गरी प्यानलको उम्मेदवारी घोषणा गरेको हो ।
खड्का नेतृत्वको प्यानलबाट संघका वर्तमान सचिव तपेन्द्र कुँवर उद्योग उपाध्यक्ष र कोषाध्यक्ष लोकेश साउँद वाणिज्य उपाध्यक्ष पदमा चुनावी मैदानमा छन् । संघको महासचिवका लागि कार्यसमिति सदस्य पृथ्वीराज ढुंगाना, सचिवमा हिक्मत रावल र कोषाध्यक्षमा टेकबहादुर सोडारी चुनावी मैदानमा उत्रिएका छन् ।
खड्का नेतृत्वको प्यानलबाट आठ जना खुल्ला सदस्यहरुका लागि रुपकबहादुर विष्ट, मोतीसिंह खत्री, डम्बर कडायत, उपेन्द्र बटाला, हेमन्त रिमाल, सैलेश साउँद (ह्यारी), जनकबहादुर विष्ट र विजय धामी चुनावी मैदानमा उत्रिएका छन् ।
त्यस्तै आरक्षण सदस्यतर्फ खड्का नेतृत्वको प्यानलबाट महिला सदस्यमा जानकी शाह, दलित सदस्यमा रामबहादुर टमट्टा र जनजाति सदस्यमा सन्तोष कठरिया चुनाबी मैदानमा उत्रिएका हुन् । उम्मेदवारी घोषणा कार्यक्रममा बोल्दै अध्यक्ष पदका प्रत्यासी खड्काले आफू व्यवसायीको सुखदुःखमा सदैब साथमा रहने बताए ।
‘वर्तमान कार्यसमितिको कार्यवाहक अध्यक्ष रहेर पनि मैले उद्योगी व्यवसायीका समस्या र सुखदुःखमा साथमा रहँदै आएको थिएँ’ खड्काले भने ‘भन्सारमा क्वारेन्टाइन निर्माण, व्यवसायीका हकहित स्थापित गर्न, व्यावसायिक वातावरण बनाउन, केरालाई टीकापुरको ब्राण्ड बनाउन म सदैव लाग्ने प्रण गर्दछु ।’
संघका प्रथम उपाध्यक्ष सन्तोष खड्का र द्वितीय उपाध्यक्ष कृष्णप्रसाद बजगाईं प्यानलसहित चुनावी मैदानमा उत्रिएपछि चुनावी सरगर्मी बढेको हो ।
