टीकापुर, कात्तिक १९
टीकापुर जेसीजका निवर्तमान अध्यक्ष रुपकबहादुर बिष्टले नेपाल जेसीज वर्ष २०२६ का लागि राष्ट्रिय उपाध्यक्ष पदमा उम्मेदवारी दर्ता गरेका छन । उनी सुदूरपश्चिमबाट उम्मेदवारी दर्ता गर्ने एक्लो उम्मेदवार हुन । 

टीकापुर जेसीज वर्ष २०२४ को कुशलतापूर्वक जिम्मेवारी बहन गरिसकेका बिष्टले राष्ट्रिय उपाध्यक्ष मार्फत देशभरका युवाहरुसँग मिलेर रचनात्मक काम गर्ने उद्देश्यले उम्मेदवारी दर्ता गरेको बताएका छन । 

नेपाल जेसीजको ५२ औ राष्ट्रिय महाधिवेशनबाट वर्ष २०२६ को लागि नयाँ नेतृत्व चयन हुनेछ । ५२ औं राष्ट्रिय महाधिवेशन पुष ४ देखी ६ गतेसम्म मधेश प्रदेशको राजधानी जनकपुरमा हुने तय भएको छ । जनकपुर जेसीजको आतिथ्यतामा हुने ५२ औं राष्ट्रिय महाधिवेशनको तयारी तिब्र गतिमा भैरहेको छ । देशभरका १८ देखी ४० वर्ष उमेर समूहका युवाहरुको सहभागीता रहने जेसीजको नेतृत्व हरेक वर्ष चयन हुने गर्छ ।

टीकापुरका युवा व्यवशायी बिष्ट भदौ २१ गते भएको टीकापुर उद्योग वाणिज्य संघको निर्वाचनबाट सदस्य पदमा अत्याधिक मतका साथ विजयी भएका छन । उनी टीकापुरस्थित एल एन बुक्सका सञ्चालक हुन । 

यसैगरी आगामी नेतृत्वका लागि अन्य व्यक्तिहरुले समेत विभिन्न पदमा उम्मेदवारी दर्ता गरेका छन । राष्ट्रिय अध्यक्षका लागि ७ जनाको उम्मेदवारी दर्ता भएको छ । उम्मेदवारी दर्ता गर्नेमा रश्मी शिल्पकार, गणेश सापकोटा, विजय गुरुङ, जीवन कार्की, राजाराम गौतम, भीम कुँवर र सुनिल तिमिल्सिना रहेका छन । 

त्यस्तै राष्ट्रिय कार्यकारिणी उपाध्यक्षमा समेत ७ जनाको उम्मेदवारी दर्ता भएको छ । उम्मेदवार दर्ता गर्नेमा विकेशलाल श्रेष्ठ, अभिषेक दुलाल, सुमित्रा भट्टराई, नवराज उपाध्याय, दिपकजंग अधिकारी, स्वप्ना पौडेल भण्डारी र योगेश राजवंशी रहेका छन । 

राष्ट्रिय उपाध्यक्षमा भने १६ जनाको उम्मेदवारी दर्ता भएको छ । सुरेन्द्र श्रेष्ठ, खगेन्द्र भण्डारी, विदुर थापा, सन्दिप भुसाल, आरोग्य श्रेष्ठ, दिपेश बराइली, मेनुका वली लोहनी, रमेश भुर्तेल, अमन महर्जनले उम्मेदवारी दर्ता गरेका छन । त्यस्तै अनिष भट्टराई, एन्जिला खड्का, रुपकबहादुर बिष्ट, सुरज पौडेल, सुजिना डंगोल, जितेन्द्र रौनियार र नविन श्रेष्ठले समेत उम्मेदवारी दर्ता गरेका छन ।