जाजरकोट, पौष १७
कर्णाली प्रदेशको पहाडी जिल्ला जाजरकोटमा सिकार खेल्न गएका एक जनाको मृत्यु भएको छ । जिल्लाको बारेकोट गाउँपालिका वडा नं. ८ का ३६ वर्षीय प्रचण्डदेव सिंहको मृत्यु भएको प्रहरीले जनाएको छ ।

जिल्ला प्रहरी कार्यालयका सूचना अधिकारी सुधीकुमार खड्काका अनुसार पौष १३ गते सिंहसहित ६ जना सिकार खेल्न गएका थिए । त्यस क्रममा प्रचण्डदेवको मृत्यु भएको हो ।

प्रहरीले प्रचण्डदेवसँगै सिकार खेल्न गएका पाँच जनालाई भरुवा बन्दुकसहित पक्राउ गरेको छ । अनुसन्धानका क्रममा घटनास्थल नजिक खाल्डोमा भरुवा बन्दुकसहितका हात हतियार फेला परेपछि बारेकोट गाउँपालिका वडा नं. ८ का ४५ वर्षीय इन्द्रबहादुर सिंह, ५४ वर्षीय मीमबहादुर सिंह, २४ वर्षीय राजीव शाही, ४४ वर्षीय जनक कार्की र १९ वर्षीय लालबहादुर सिंहलाई पक्राउ गरिएको हो ।

अभियुक्तहरूबाट तीन थान भरुवा बन्दुक, दुई थान फलामको चक्कु, १३५.१८ ग्राम बारुद र २१ थान भरुवा बन्दुकमा प्रयोग हुने धातुका टुक्रा बरामद भएका छन् ।