साँफेबगर, साउन २६ 
सुदूरपश्चिमको पहाडी जिल्ला अछाममा भालुको आक्रमणबाट २० वर्षीय एक युवक घाइते भएका छन् । चौरपाटी गाउँपालिका वडा नं. ६ दुनी सेलपाखाका नबिन आउजी भालुको आक्रमणमा परी घाइते भएका हुन् ।

प्रहरीका अनुसार सोमबार साँझ करिब ६ बजे घर नजिकैको दोगडी खोलामा गोरु चराएर घर फर्किने क्रममा आउजी माथि भालुले आक्रमण गरेको थियो । भालुको आक्रमणबाट उनको टाउको, अनुहार र पिठ्युँमा चोट लागेको छ ।

घटनापछि स्थानीयको सहयोगमा घाइते आउजीलाई उपचारका लागि बयालपाटा प्रादेशिक अस्पताल लगिएको थियो । 

जिल्ला प्रहरी कार्यालय अछामका प्रमुख प्रहरी नायब उपरीक्षक पविन्द्र बहादुर बमका अनुसार घाइते आउजीको अवस्था मध्यम रहेको बमले बताएका छन् । भालुको आक्रमणपछि सेलपाखा क्षेत्रमा स्थानीयवासी त्रसित बनेका छन् ।