काठमाडौं, साउन २६
राष्ट्रिय स्वतन्त्र पार्टी (रास्वपा) की सांसद करिश्मा कठरियाले मधेश–थरूहट आन्दोलनका क्रममा भएका घटनाबारे छानबिन गर्न बनेको लाल आयोगको प्रतिवेदन सार्वजनिक गर्न माग गरेकी छन् ।

उनले प्रतिनिधिसभाको बैठकमा भनेकी छन् ‘आउँदो ७ भदौभित्रै लाल आयोगको प्रतिवेदन सार्वजनिक गरी निर्दोष थारूहरूलाई अविलम्ब न्याय दिलाउन म सरकारको गम्भीर ध्यानाकर्षण गराउन चाहन्छु ।’

एक नाबालकसहित ८ सुरक्षाकर्मीको ज्यान जाने गरी २०७२ साल ७ भदौमा टीकापुरमा हिंसात्मक घटना भएको थियो । उक्त घटना थारू समुदाय र सिंगै देशका लागि अत्यन्तै दुखद् र कालो दिन रहेको उनले बताइन् ।

‘थारू र पहाडी समुदायबीच भड्काउ पैदा गरेर नरसंहार मच्चाउने पर्दा पछाडिका दोषीहरू को थिए ?’ उनको प्रश्न छ ।
यो प्रश्न अहिले पनि अनुत्तरित रहेको भन्दै उनले लाल आयोगको प्रतिवेदन सार्वजनिक गर्न माग गरेकी हुन् ।