कञ्चनपुर, भदौ १४
एक नेपाली नागरिकलाई पक्राउ गर्न भन्दै कञ्चनपुरमा आएका भारतीय प्रहरीलाई फर्काइएको छ ।

शनिबार दिउँसो कर्नाटकबाट बलात्कार मुद्दाका आरोपी शंकर लुहारलाई पक्राउ गर्न भन्दै दोधारा चाँदनीस्थित घरमै पुगेका उनीहरुलाई स्थानीयले नियन्त्रणमा लिएर प्रहरीलाई बुझाएका थिए ।

केही घण्टा इलाका प्रहरी कार्यालय दोधारा चाँदनीको नियन्त्रणमा राखिएका असईसहितका दुई जना भारतीय प्रहरीलाई भारततिरै फर्काइएको जिल्ला प्रहरी कार्यालय कञ्चनपुरले जनाएको छ ।

जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) टेकबहादुर रावतले दुवै जनालाई भारत नै फर्काइएको जानकारी दिए । उनका अनुसार उनीहरू नेपाल नै घर भएका पीडितको बलात्कार सम्बन्धी मुद्दामा लुहारलाई पक्राउ गर्न भन्दै उनको घरमा पुगेको पाइएको छ ।

प्रहरीले पूर्व समन्वय र प्रचलित कानुन विपरीत अनाधिकृत रुपमा नेपाल छिरेको भन्दै उनीहरुलाई सम्झाई बुझाइ गरेर छाडिएको जनाएको छ । पूर्व जानकारी र अनुमतिबिना नेपाली भूमीमा प्रवेश गरेका कर्नाटक प्रहरीका असई सतिश एमआर र जवान अल्फाब आरएस भारत फर्किएका छन् ।