टीकापुर, भदौ २५

कैलालीको टीकापुरमा आगामी मङ्सिर १२ देखि २२ गतेसम्म आयोजना हुने श्री विराट अष्टोत्तरसत १०८ कुण्डीय गोपाल कोटीहोम महायज्ञको तयारी तीव्र पारिएको छ ।

नेपालकै ठूलो धार्मिक महायज्ञका रूपमा आयोजना गर्न लागिएको कोटीहोम सम्पन्न गर्न विभिन्न उपसमिति गठन गरी जिम्मेवारी बाँडफाँड गर्ने तथा आवश्यक पूर्वाधार र व्यवस्थापनको कामलाई गति दिइएको आयोजकले जनाएको छ ।

महायज्ञ परिसरको सरसफाई तथा वातावरण संरक्षणका लागि गोपालप्रसाद चौधरीको संयोजकत्वमा उपसमिति गठन गरिएको छ । त्यस्तै, महायज्ञमा श्रद्धालु तथा भक्तजनको सहभागिता व्यवस्थित गर्न नरेशकुमार खत्रीको संयोजकत्वमा जनपरिचालन उपसमिति गठन गरिएको छ ।

महायज्ञलाई धार्मिक, सामाजिक तथा सांस्कृतिक दृष्टिले भव्य र व्यवस्थित बनाउन तयारीका कामहरू चरणबद्ध रूपमा अघि बढाइएको ईश्वर प्रेमी सेवा आश्रमका महासचिव पुष्पराज बमले जानकारी दिए ।

महासचिव बमका अनुसार महायज्ञमा देशका विभिन्न स्थानबाट साधुसन्त, धार्मिक व्यक्तित्व तथा श्रद्धालुको सहभागिता रहने अपेक्षा गरिएको छ । 
महायज्ञलाई टीकापुरको धार्मिक पर्यटन तथा सामाजिक एकताको महत्वपूर्ण अवसरका रूपमा अघि बढाउने तयारी भइरहेको छ ।

आयोजकका अनुसार महायज्ञ अवधिभर धार्मिक अनुष्ठान, पूजापाठ, प्रवचनलगायत कार्यक्रम सञ्चालन गरिनेछन् । महायज्ञलाई व्यवस्थित बनाउन सुरक्षा, सरसफाइ, स्वयंसेवक परिचालन, श्रद्धालुको व्यवस्थापन तथा अन्य आवश्यक तयारीलाई समेत प्राथमिकतामा राखिएको छ ।