टीकापुर, असोज १
पछिल्लो पटक बढ्दै गएको जापानिज इन्सेफ्लाइटिस (जेई) विरुद्धको खोप अभियान आजदेखि शुरु गरिएको छ । 

कैलालीको लम्कीचुहा, घोडाघोडी नगरपालिका तथा धनगढी उपमहानगरपालिकामा जापानिज इन्सेफ्लाइटिस (जेई) विरुद्धको खोप अभियान सञ्चालन भएको हो । संक्रमण बढ्दै गएपछि लम्कीचुहा र घोडाघोडी नगरपालिकामा आजदेखि अभियान सञ्चालन गरिएको हो । 

स्वास्थ्य कार्यालय कैलालीका प्रमुख रमेश कुँवरका अनुसार घोडाघोडी र लम्कीचुहा नगरपालिकामा असोज १ देखि ७ गतेसम्म तथा धनगढी उपमहानगरपालिकामा असोज ८ देखि २२ गतेसम्म खोप अभियान सञ्चालन हुनेछ ।

अभियानमा ३० वर्ष वा सोभन्दा माथिका १ लाख ८२ हजार ३१३ जनालाई खोप लगाउने लक्ष्य राखिएको छ । धनगढीमा १ लाख २ हजार ४९९, घोडाघोडीमा ३९ हजार ५९ र लम्कीचुहामा ४० हजार ७५५ जनालाई खोप लगाइनेछ ।

अभियानका लागि १ लाख ९१ हजार ४२९ डोज खोप आउने क्रममा रहेको स्वास्थ्य कार्यालयले जनाएको छ । कुँवरका अनुसार सन् २०२६ को सुरुवातयता घोडाघोडीमा जेई संक्रमणबाट दुई जनाको मृत्यु भएको छ भने धनगढी र लम्कीचुहामा तीन/तीन जना संक्रमित भएका छन् ।

जेई लामखुट्टेको टोकाइबाट सर्ने भाइरल रोग हो, जसले मुख्यतः मस्तिष्कमा असर गर्छ । यसबाट जोगिन लामखुट्टे नियन्त्रण, सरसफाइ, घरमा झ्यालढोकामा जालीको प्रयोग र पानी जम्न नदिन स्वास्थ्य कार्यालयले आग्रह गरेको छ ।