टीकापुर, असोज २
कैलालीको टीकापुर नगरपालिका वडा नं. ७ सत्तीका सुरेशकुमार कर्ण इजरायलको राजदूतमा सिफारिस भएका छन् । सत्ती घर भई लामो समयदेखि काठमाडौंमा व्यवसाय गर्दै आएका कर्ण कम्प्युटर एशोसियसन अफ नेपाल (क्यान)का पूर्व अध्यक्ष हुन् । 

सुरेशकुमार कर्ण सूचना प्रविधि, बैंकिङ र आर्थिक नीति क्षेत्रका वरिष्ठ व्यक्तित्व हुन् । कर्णलाई कार्यकारी नेतृत्वमा ३० वर्षभन्दा बढीको अनुभव छ। कुमारी बैंकको प्रमुख सूचना तथा विपणन अधिकृत (२००३–२०१५) को रूपमा उनले नेपालको पहिलो मोबाइल वालेट “कुमारी मोबाइल क्यास” को अवधारणा तयार गरी सञ्चालनमा ल्याएका थिए । जसलाई दक्षिण एसियाको ‘एमबिलियन्थ अवार्ड’ प्राप्त भएको थियो।

उनले नेपाल बैंक लिमिटेडको प्रमुख सञ्चालन अधिकृत (COO) (२०१५–२०१९) का रूपमा एकीकृत कोर बैंकिङ सिस्टममा रूपान्तरण गर्ने कार्यको नेतृत्व गरे। सन् २०२४ देखि उनले वैदेशिक लगानी तथा प्रविधि हस्तान्तरण ऐन २०७९ अन्तर्गत नेपालको पहिलो जापानी प्रत्यक्ष वैदेशिक लगानीको प्रविधि संस्था कुमो ल्याब्स प्रालिको अध्यक्षता गर्दै आएका छन्।

उनले कम्प्युटर एसोसिएसन अफ नेपाल (क्यान महासंघ) को लगातार दुई कार्यकाल अध्यक्षका रूपमा सेवा गरे। उनी नेपालको आईटी काउन्सिल र सूचना प्रविधि उच्चस्तरीय आयोगको पदझेन सदस्य थिए भने नेपालको पहिलो राष्ट्रिय आईटी नीति (२०००) को मस्यौदा तयार गर्न योगदान दिएका थिए। उनले बेइजिङ नर्मल युनिभर्सिटीको बेल्ट एण्ड रोड स्कूलबाट अन्तर्राष्ट्रिय व्यापार, लगानी तथा पूर्वाधार अर्थशास्त्रमा MBA गरेका छन् र उनी ‘इन्स्टिच्युसन अफ इन्जिनियर्स (इन्डिया)’ का फेलो हुन्।

उनलाई ‘राष्ट्रिय ICT उत्कृष्ट पुरस्कार’ (२०१९) बाट सम्मानित गरिएको छ। उनको अन्तर्राष्ट्रिय अनुभवमा ASOCIO सम्मेलन, भिसा (VISA) वैश्विक बैठकहरू र कोरिया सूचना सुरक्षा एजेन्सीसँगको सूचना सुरक्षा तालिम समावेश छन्। उनले आफ्नो करियरको सुरुवात नेपाल प्रहरीको निरीक्षक (इन्स्पेक्टर) पदबाट गरेका थिए, जहाँ उनी राष्ट्रिय एकेडेमी टोलीमा प्रथम भएका थिए।