टीकापुर, साउन २४
चुनावी सरगर्मी चलिरहेका बेला टीकापुर साना शहरी खानेपानी उपभोक्ता तथा सरसफाई संस्थाले १३ करोड ८ लाख रुपैयाँ भन्दा बढी ऋण तिर्न बाँकी देखिएको छ ।
संस्थाको आज सम्पन्न नवौं वार्षिक साधारण सभाको बन्दसत्रमा कार्यवाहक अध्यक्ष सिर्जना शर्मा पण्डितद्धारा प्रस्तुत गरिएको प्रतिवेदनमा संस्थाले अझै १३ करोड ८ लाख ७ हजार ३ शय ५४ रुपैयाँ ऋण तिर्न बाँकी देखिएको हो ।
प्रतिवेदनमा नगर विकास कोषसँग लिइएको ऋण मध्ये आर्थिक वर्ष २०८१/०८२ मा साँवा रकम ५९ लाख २५ हजार ३९८ रुपैयाँ र ब्याज रकम ६६ लाख ७४ हजार ६१० रुपैयाँ गरी १ करोड २६ लाख रुपैयाँ भुक्तानी गरेको उल्लेख छ । यसै आर्थिक वर्षमा ५० लाख मुद्दती निक्षेपमा जम्मा गरेको संस्थाले यस आर्थिक वर्षमा मात्रै १ करोड २२ लाख १२ हजार ९३२ रुपैयाँ खुद नाफा आर्जन गरेको छ ।
संस्थाका कोषाध्यक्ष विश्राम चौधरीद्धारा प्रस्तुत गरिएको आर्थिक प्रतिवेदनमा संस्थाले ४ करोड ६४ लाख ५२ हजार ५ शय ९८ हजार रुपैयाँ कुल आम्दानी गरेको छ भने ३ करोड ४२ लाख ३९ हजार ६ शय ६५ रुपैयाँ कुल खर्च गरेको छ ।
सबैभन्दा बढी कर्मचारी तबल भत्ता खर्च बाहेक प्रत्यक्ष खर्च १ करोड ५६ लाख ९१ हजार ७ शय ११ रुपैयाँ, कर्मचारी तथा कामदार खर्च ८९ लाख ६ हजार १ शय ५४ रुपैयाँ, कार्यालय सञ्चालन १८ लाख १२ हजार ३ शय ८७ रुपैयाँ खर्च भएको प्रतिवेदनमा उल्लेख छ । प्रतिवेदनमा संस्थाका पूर्व उपाध्यक्ष गोपीराम जैशीका नाममा १० लाख संस्थाले पाउनु पर्ने उल्लेख छ ।
यसअघि वार्षिक साधारण सभाको उद्घाटन समारोह संविधानसभा सदस्य हरि ज्ञवालीको प्रमुख आतिथ्यतामा भएको थियो । कार्यवाहक अध्यक्ष पण्डितको अध्यक्षतामा कार्यक्रममा प्रदेश सभा सदस्य ललिता सुनार, पूर्व नगर प्रमुख तपेन्द्रबहादुर रावल, संस्थाका पूर्व अध्यक्ष नवराज रावल, भैरबसिंह रावल, खानेपानी महासंघका अध्यक्ष खेमराज ओली, इलाका प्रशासन कार्यालय टीकापुरका प्रमुख किरण थापा बोलेका थिए ।
त्यस्तै कार्यक्रममा नेपाली काँग्रेसका झनक तिमिल्सेना, नेकपा एमालेका लक्ष्मण थापा, नेकपा माओवादीका धनसिंह साउँद, राष्ट्रिय स्वतन्त्र पार्टीका रवीन्द्र विष्ट, नेकपा एकीकृत समाजवादीका झपटबहादुर सोडारी, राष्ट्रिय प्रजातन्त्र पार्टीका डम्बर थापा र नागरिक उन्मुक्ति पार्टीका गोपाल थापा लगायतले बोलेका थिए ।
