काठमाण्डौं, भदौ २२
जिल्ला प्रहरी परिसर काठमाडौंले राष्ट्रिय क्रिकेट टोलीका कप्तान सन्दीप लामिछानेविरुद्ध परेको जबरजस्ती करणीको जाहेरी अनुसार निष्पक्ष रुपमा अनुसन्धान गर्ने बताएको छ ।
जिल्ला प्रहरी परिसर, काठमाडौंका प्रमुख प्रहरी वरिष्ठ उपरीक्षक भरतबहादुर बोहोराले लामिछाने विरुद्ध जाहेरी अनुसार अनुसन्धान सुरु भइसकेको जानकारी दिए ।
उनका अनुसार प्रहरीले घटनाको प्रमाण संकलन गर्ने र बयान लिने काम पनि अगाडि बढाएको छ । प्रहरीले काठमाडौं र नगरकोटमा बसेको होटलको सिसिटिभी फुटेज पनि संकलन गरेको छ । सम्पूर्ण कागजी कामहरू सकाएर जिल्ला अदालत काठमाडौंबाट पक्राउ पुर्जी माग्ने प्रहरीको तयारी छ ।
जिल्ला प्रहरी परिसर काठमाडौंले बुधबार विज्ञप्ति निकालेर लामिछानेविरुद्ध १७ वर्षीया बालिकालाई बलात्कार गरेको किटानी उजुरी परेको जनाएको छ ।
जाहेरी परेलगत्तै वान डोर क्राइसिस म्यानेजमेन्ट सेन्टर (ओसीएमसी) मा बालिकाको स्वास्थ्य परीक्षण गराइएको विज्ञप्तिमा उल्लेख छ ।
उजुरीमा ती नाबालिकाले गत भदौ ५ गते काठमाडौँ र भक्तपुरको विभिन्न स्थानहरूमा लगी काठमाडौँ ल्याई रातको अन्दाजी ११ः५५ बजे काठमाडौं महानगरपालिका–९ स्थित एक होटलको कोठा नं. ३०५ मा लामिछानेले आफूलाई राखेको बताएकी छन् ।
उनले भदौ ६ गते राति अन्दाजी १२ः ५ बजेसम्म पटक पटक जबरजस्ती करणी गरेको लगायत उल्लेख गरी भाद्र २१ गते प्रहरी बृत्त, गौशालामा लामिछानेविरुद्ध जाहेरी दर्ता भएको प्रहरीले जनाएको छ ।
नाबालिगमाथि बलात्कार गरेको आरोप लागेका राष्ट्रिय क्रिकेट टोलीका कप्तान सन्दीप लामिछाने अहिले क्यारेबियन मुलुक सेन्ट लुसियामा छन् । उनी क्यारेबियन प्रिमियर लिग खेल्न गएका हुन ।
