टीकापुर, असोज २८
पार्टीले दिएको उम्मेदवार विरुद्ध बागी उठेको भन्दै नेकपा एमाले सुदूरपश्चिमले एमालेका विजयराज सिंह मयाललाई पार्टीबाट निस्कासित गरेको छ ।
एमाले सुदूरपश्चिमले एक विज्ञप्ति जारी गर्दै पार्टीका उम्मेदवार विरुद्ध बागी उम्मेदवारी दिएका मयाललाई पार्टीबाट निस्कासित गरेको हो ।
मयालले कैलालीको क्षेत्र नं. १ बाट प्रतिनिधि सभा सदस्यका लागि स्वतन्त्रबाट उम्मेदवारी दिएका छन् ।
मयालसँगै प्रतिनिधि सभा र प्रदेशसभा सदस्यमा बागी उम्मेदवारी दिएका पाँच जनालाई पार्टीले निस्कासन गरेको हो । प्रदेश सचिव धर्मराज पाठकले दिएको जानकारी अनुसार प्रतिनिधि सभा सदस्यका दुई र प्रदेश सभा सदस्यका तीन जना उम्मेदवारलाई कारबाही गरिएको छ ।
एमालेले एक विज्ञप्ति जारी गर्दै बागी उम्मेदवारलाई निस्कासित गरेको हो ।
प्रदेश सभा सदस्यका लागि कञ्चनपुरको क्षेत्र नम्बर १ को क बाट उम्मेदवारी दिएका भक्तबहादुर अधिकारी, क्षेत्र नम्बर १ बाटै प्रतिनिधिसभा सदस्यका लागि बागी उम्मेदवारी दिएका खेम सुवेदी, क्षेत्र नम्बर २ को क बाट प्रदेशसभा सदस्यका लागि उम्मेदवारी दिएका टेकबहादुर हमाल, क्षेत्र नम्बर १ को ख बाट प्रदेशसभा सदस्यका लागि उम्मेदवारी दिएका टेकबहादुर साउँदलाई समेत निस्कासन गरेको हो ।
उनीहरुलाई पार्टीका आधिकारिक उम्मेदवारविरुद्ध बागी उम्मेदवारी दिएकाले एमालेले कारबाही गरेको हो ।
एमालेले एक विज्ञप्ति जारी गर्दै भनेको छ ‘सुदूरपश्चिम प्रदेशका विभिन्न जिल्लाका पार्टीको विभिन्न जिम्मेवारीमा रहेका ५ जनालाई पार्टीको विधानको धारा ८० को ६ बमोजिमको गम्भीर प्रकृतिको अनुशासन उल्लंघन गरेकोले पार्टी बिधान तथा पार्टी केन्द्रको यस अघिको नीतिगत निणर्य अनुसार निजहरुलाई पार्टी सदस्य समेत नरहने गरी सम्बन्धित कमिटीबाट कारबाही भएको ब्यहोरा जानकारी गराउँदछु ।’
