टीकापुर, कार्तिक २३
डोटीमा भूकम्पमा परि घाईते भएका दुई जनालाई त्यहाँको जिल्ला अस्पतालले धनगढी रेफर गरेको छ। जिल्ला अस्पतालमा उपचार सम्भव नभएपछि उनीहरुलाई नेपाली सेनाको हेलिकोप्टरमार्फत धनगढी ल्याइएको हो।
पूर्वीचौकी गाउँपालिका-३ की ४० बर्षीया चना बोहरा र ५० वर्षीया बिष्ना बोहरालाई रेफर गरिएको जिल्ला अस्पतालका मेडिकल सुपरिटेण्डेण्ट डा निराजन श्रेष्ठले जानकारी दिए।
डा श्रेष्ठका अनुसार चनाको छातीमा हावा जमेको, चारवटा करङ्ग भाँचिएको र घाँटीको हड्डी भाँचिएको छ। उनको छातीबाट हावा निकाली थप उपचारका लागि सेती प्रादेशिक अस्पताल धनगढी पठाइएको हो। घाँटीका हड्डी भाँचिएकोले उनको सिटी स्क्यान गर्नुपर्ने अवस्था रहेको डा श्रेष्ठ बताउँछन् ।
यस्तै बिष्नाको हात भाँचिएको छ। अन्य घाइतेहरुको उपचार जिल्ला अस्पतालमा भइरहेको डोटी अस्पताल विकास तथा व्यवस्थापन समितिका अध्यक्ष धनबहादुर नेपालीले जानकारी दिए।
