टीकापुर, १७ फागुन

इलाका प्रहरी कार्यालय टीकापुरको प्रमुखका रुपमा आएका डीएसपी उद्धवसिंह भाटले कार्यालयमा हाजिर भएको २२ दिनमै १७ वटा मुद्दा दर्ता गरेका छन् ।

माघ २५ गते कार्यालयमा हाजिर भएका डिएसपी भाटले आएको २२ दिनमै लागुऔषधका १०, सार्वजनिक हित समेत विरुद्ध ३, बैंकिङ्क कसुर १, मुद्रा सम्बन्धी कसुर १, सवारी ज्यान १ र चोरी सम्बन्धी कसुर १ गरी १७ वटा मुद्दा दर्ता गरेका छन् । ती घटनामा संलग्नता देखिएको १९ जनालाई पक्राउ गरिएको छ ।

लामो समयदेखि लागुऔषधको बिगबिगी बढिरहेको चर्चा चलिरहँदा डिएसपी भाटले कमाण्ड समालेको २२ दिनमै ३८ ग्राम १३० मिलिग्राम लागुऔषध खैरो हेरोइन बरामद गरेका छन् । सम्भवतः उक्त परिमाण इलाका प्रहरी कार्यालय, टीकापुरले पक्राउ गरेको हालसम्मकै उच्च परिमाण हो ।

टीकापुर क्षेत्रमा मुख्य रुपमा गुण्डागर्दी र लागुऔषध दुव्र्यसन मुख्य समस्या रहेको बताउँदै डिएसपी भाटले आफ्नो पहिलो प्राथमिकता गुण्डागर्दी र लागुऔषध कारोवार नियन्त्रण रहेको बताए । टीकापुर क्षेत्रका सञ्चारकर्मीसँगको भेटघाट कार्यक्रममा डिएसपी भाटले सो कुरा बताएका हुन् ।

‘थोरै दिन भो यहाँ आएको, मेरो बुझाईमा यहाँ गुण्डागर्दी र त्योसँग जोडिएको लागुऔषध मुख्य समस्याका रुपमा रहेको छ’ डिएसपी भाटले भने ‘कानुनले दिएको अधिकार, प्रहरीको कर्तव्यलाई ध्यानमा राखेर यी गतिविधि नियन्त्रणमा मेरो पहिलो प्राथमिकता हुनेछ ।’

डिएसपी भाटले २ जना फरार अभियुक्तलाई पक्राउ गरी अदालतको जिम्मा लगाइएको समेत जानकारी दिए । डीएसपी भाटले यस अवधिमा रातिको समयमा शङ्कास्पद गतिविधिमा संलग्न व्यवहार देखाउने विभिन्न १ शय ७४ जनालाई नियन्त्रणमा लिई सम्झाई बुझाइ छाडिएको जानकारी दिए ।

भूपेन्द्र बडुवाल हत्या काण्डलाई आफुले सूक्ष्म ढङ्गले अध्ययन गरिरहेको बताउँदै डीएसपी भाटले यसक्षेत्रको आपराधिक गतिविधि नियन्त्रणका लागि सहयोग गर्न अनुरोध गरेका छन् ।

भेटघाटका क्रममा डिएसपी भाटले यस क्षेत्रमा भइरहेको नदीजन्य पदार्थको अवैध उत्खनन्मा संलग्नतालाई नियन्त्रणमा लिइ कानुनी दायरामा ल्याउने बताए ।