टीकापुर, माघ ३० 
कैलालीको धनगढीमा कृषि विकास निर्देशनालय डोटीले आयोजना गरेको प्रथम प्रदेशस्तरीय कृषि तथा पशुपन्छी मेला प्रदर्शनी २०८१ मा टीकापुरका पाँच जना केरा किसान सम्मानित भएका छन् । 

कार्यक्रमको समापन समारोहमा केराखेती गर्दै आएका बनाना किङ्गका नामले परिचित टीकापुर नगरपालिका वडा नं. १ का कालु हमाल, वडा नम्बर १ का विनोदकुमार साह र दीपेन्द्र थारुलाई केराखेती विधातर्फ दीर्घ सेवा कदर पत्रसहित सम्मान गरिएको हो ।

चितवनको रामपुर कृषि क्याम्पसबाट कृषि विषयमा स्नातक अध्ययन गरेर २०४० सालदेखि टीकापुर क्षेत्रमा केराखेतीको विकास र विस्तारमा सक्रिय रहँदै आएका हमाललाई दीर्घ सेवा कदर पत्रसहित सम्मानित भएका हुन ।

केरा कृषक साह विगत दुई दशकदेखि टीकापुरमा केरा खेती गर्दै आइरहेका छन् । हमाल र साह राष्टपति कृषक पुरस्कारबाट समेत सम्मानित किसान हुन् । त्यस्तै केरा कृषक थारु दश वर्षदेखि व्यावसायिक रुपमा केराखेती गर्दै आइरहेका छन् ।  

त्यस्तै नेपालमै पहिलो पटक टिस्युकल्चर प्रविधिबाट उत्पादन भएका केराको नर्सरी सञ्चालनमा ल्याएका टीकापुर नगरपालिका वडा नम्बर ४ का युवा कृषक टेकेन्द्र धामीलाई केरा नर्सरी विधामा दीर्घ सेवा कदर पत्रसहित सम्मान गरिएको हो ।

उनले २०६८ सालदेखि केराखेती सहित नर्सरी सञ्चालन गर्दै आइरहेका छन् । धामीको नर्सरीमा उत्पादित केराका बिरुवाहरु धनगढी, महेन्द्रनगर, सुर्खेत, दाङ्ग, बर्दिया, बाँके लगायत जिल्लाका किसानहरुले खेती गर्दै आइरहेका छन् । 

त्यस्तै टीकापुरकै केरा कृषक आकाश कुँवरलाई केराखेतीको विस्तारमा योगदान पुर्याएको भन्दै सम्मान गरिएको हो । कुँवरले जोशीपुर क्षेत्रमा केराखेती गर्दै आइरहेका छन् ।   

पाँचै जना किसानहरुलाई प्रदेशका भूमि व्यवस्था, कृषि तथा सहकारी मन्त्री वीरबहादुर थापा, प्रदेश सचिव यज्ञराज जोशी र कृषि विकास निर्देशनालय डोटीका महानिर्देशक खगेन्द्रप्रसाद शर्माले कदर पत्र प्रदान गरेका हुन् । 

'सुदूरपश्चिम प्रदेशको समृद्धिका लागि समग्र कृषि क्षेत्रको आधुनिकीकरण, व्यावसायीकरण, विविधिकरण र औद्योगीकीकरण' भन्ने मुल नाराका साथ माघ २६ गतेदेखि सुदूरपश्चिम प्रदेश सरकार, भूमि व्यवस्था, कउषि तथा सहकारी मन्त्रालयले प्रदर्शनी आयोजना गरेको हो । 

प्रदर्शनीमा सुदूरपश्चिममा व्यावसायिक रुपमा उत्पादित कृषि उपजहरु, कृषि प्रचार सम्बन्धी विभिन्न कार्यक्रमहरु सञ्चालन भएका थिए ।