धनगढी, असार २
सुदूरपश्चिम प्रदेश स्तरीय खेलकुद पत्रकारिता तालिम कैलालीको खानीडाँडामा सुरु भएको छ । खेलकुद क्षेत्रमा पत्रकारहरूको क्षमता विकास गर्ने उद्देश्यले २ दिने तालिम आजदेखि सुरु गरेको आयोजक खेलकुद पत्रकार मञ्च कैलालीले जनाएको छ ।

खेलकुद मञ्च कैलालीको आयोजना र आन्तरिक मामिला तथा कानुन मन्त्रालय धनगढी, कैलालीको आयोजनामा खेल विधालाई पत्रकारितामा अगाडी बढाउन पत्रकारहरूको लागि तालिमको आयोजना गरिएको आयोजकले बताएका छन् ।

२०६७ सालमा स्थापना भएको खेलकुद पत्रकार मञ्चले विभिन्न समयमा खेल विधालाई पत्रकारिताका माध्यमबाट अगाडि बढाउँदै आएको आयोजकले जानकारी दिए । विश्वभरि जति महत्वपूर्ण खेल बन्दै गएको छ त्यसै अनुरूप खेलकुद पत्रकारिताको पनि महत्व बढेको समयमा पत्रकारहरूका लागि यो तालिम ज्यादै अर्थपूर्ण रहने आयोजकको दावी रहेको छ ।

उद्घाटन समारोहको अध्यक्षता खेलकुद मञ्च कैलालीका अध्यक्ष प्रदीप पाठकले गरेका थिए। यसै गरी तालिमको प्रमुख आतिथ्ययतामा नेपाल पत्रकार महासङ्घका सचिव बैकुण्ठराज पराजुली रहनुभएको थियो ।

तालिमको उद्घाटन समारोहमा नेपाल पत्रकार महासंघ कैलालीका अध्यक्ष श्रवण देउवा, नेपाल पत्रकार महासंघ बझाङ्गका अध्यक्ष ललित सिंह, पत्रकार दीपक उपाध्याय, खेलकुद पत्रकार मञ्चका पदाधिकारी र प्रशिक्षार्थी विभिन्न मिडियामा कार्यरत पत्रकारहरूको सहभागिता रहेको सचिव विराज रोस्याराले बताए ।